Banorët e Unazës së Re janë mbledhur në protestë para Drejtorisë së Policisë në Tiranë, pas shoqërimit në polici të 3 prej tyre.
Kërkesa e tyre është që të lirohen personat e arrestuar mëngjesin e sotëm, teksa bashkë me banorët ndodhen edhe 2 deputetët demokratë, Klevis Balliu dhe Endrit Braimllari.
“Lironi djemtë” dhe “Të gjithë për një qëllim” ishin disa nga thirrjet e banorëve, të cilët tentuan edhe të futeshin brenda ambienteve të drejtorisë. Kjo ndërhyrje e policisë vjen pas ashpërsimit të Kodit të Ri penal, i cili ka hyrë në fuqi dy ditë më parë.
Në bazë të kësaj, është ndryshuar neni për bllokimin e rrugës, i cili parashikon deri në 3 vite burg për çdo person që bllokon rrugën fizikisht. Sipas ndryshimeve, vënia e pengesave ose ndalimi i qarkullimit te mjeteve te transportit automobilistik, hekurudhor, dënohet me gjobë ose me burgim deri në tre vjet.
Ndërkohë, i pranishëm në protestë, ish-deputeti i LSI-së, Endrit Braimllari, u shpreh se Edi Rama dhe banda kriminale në pushtet bëjnë këto lëvizje thjesht për të trembur banorët e Unazës së Re.
“Damian Gjiknuri bën karshillëk si Kryetari i Komisionit të Reformës Zgjedhore, Afrim Qëndro rri nëpër zyrat e institucioneve lartë e poshtë dhe shijon pushimet nëpër resorte luksoze. Edi Rama bën show dhe tallet me qytetarët dhe nuk arrestohet”, tha Braimllari.
