Deputetët e PD-së dhe LSI-së, sot nga Kukësi, janë duke ndjekur nga afër veprimet e Policisë së Shtetit me protestuesit e djeshëm të Rrugës së Kombit. Ata kanë nisur një takim me këshilltarë bashkiakë të Kukësit.
Në Kukës kanë shkuar: ish-ministri i Brendshëm Flamur Noka, Edmond Spaho, Isuf Çela, Romeo Gurakuqi, Izmira Ulqinaku, ish-deputeti Alban Zeneli, Arben Ristani dhe 4 deputetë të LSI – Endrit Braimllari, Floida Kërpaçi, Nora Malaj dhe Përparim Spahiu.
Ndërkohë, nesër pritet një takim i kryebashkiakut të Kukësit me kryeministrin Edi Rama, i cili e njoftoi vetë dje krahas shkarkimit që i bëri këshilltarëve socialistë që e mbështetën protestën.
Rama tha: “pasi kryetari i Bashkisë së Kukësit më ka kërkuar me shkrim një takim për këtë temë, unë do të ulem me të qysh të hënën për të bashkëbiseduar, sigurisht duke shpresuar se deri të hënën, ai do të jetë distancuar jo nga kundërshtia për pagesën, por nga dhuna kriminale. Po ashtu, çdo këshilltar socialist i Bashkisë së Kukësit, që ka ngritur dorë qorrazi, apo me vetëdije për thirrjen e pseudoprotestës së ngjizur me urdhër nga Tirana për realizmin e shfaqjes së sotme të barbarisë së dhunshme, e ka humbur që sot, të drejtën që të jetë pjesë e familjes sonë politike, Partisë Socialiste të Shqipërisë.”
