Analisti i njohur, Fatos Lubonja e shikon si pjesë të propagandës arrestimet e fundit të kryera nga SPAK, teksa ngriti pyetjen se përse këto procese ndaj zyrtarëve të lartë, nuk u filluan para zgjedhjeve parlamentare të 25 prillit.
Në një intervistë për rubrikën ”Opinion” në News24, Lubonja u shpreh se qëndrimet e kryeministrit Edi Rama me kryebashkiakët dhe ministrat, tonet e ashpra, janë pjesë e regjisë dhe regjisori është vetë kreu i qeverisë.
Ndër të tjera, Lubonja tha se SPAK nuk duhet të hetojë vetëm nëpunës apo zyrtarë, por edhe politikanë të rangut të lartë, pasi pa lejen dhe miratimin e tyre nuk ndodh asgjë.
Fatos Lubonja: ”Një pyetje mund të ngrihet, ore mirë ky SPAK pse i hapi gjithë këto procese, pas zgjedhjeve dhe jo para zgjedhjeve? SPAK duhet të jetë i pavarur nga politika, e hap procesin kur maturohet.Si ka mundësi e hapi procesin dhe arrestimet u bënë pas zgjedhjeve? Gjithmonë me idenë që tani do ndërtojmë shtetin, për t’iu thirrur përgjegjësive të tyre shtetërore. Është pjesë e regjisë. Gjithmonë në funksion të një propagande. Duhet të kemi parasysh që peshku qelbet nga koka, jo nga bishti. Kryeregjisori i së keqes në kuptimin e gjithë këtij sistemi që është ndërtuar, korrupsioni, lidhjen e krimit me politikën, është Edi Rama. Këto punë i ka filluar që në bashki, duke e bërë Tiranën nga qytet të qytetarëve, në qytet të oligarkëve, është histori e gjatë, pastaj pastrimi i parave. Të gjitha këto nuk bëhen dot pa një regjisor se është dhe kryedhënësi i lejeve të ndërtimit. Prandaj ai SPAK, në qoftë se shkon deri tek ca nëpunës anonimë, ne mund të njihnim Ndrecën dhe Lleshajn, po ata poshtë jo. Pyetja që ngre çdo njeri, si ka mundësi që në këtë vend, në këtë Shqipëri, ku njeh dreqi të birin, kalokan shifra të tilla e nuk di gjë ministri e sekretari i përgjithshëm? Janë shenja të regjisë dhe propagandës”.
