Nga Rossana Miranda “Formiche”
Autoritetet meksikane, kanë sekuestruar ditët e fundit një sasi prej rreth 6.000 dozash të vaksinës ruse Sputnik V. Në deklaratën e parë për mediat, personeli i ushtrisë meksikane konfirmoi fillimin e hetimeve për të kuptuar origjinën e këtyre vaksinave, duke nënkuptuar ndër të tjera mundësinë e vjedhjes së tyre.
Gjithsesi, një zëdhënës i Sistemit të Administrimit Doganor të Meksikës,konfirmoi se vaksinat nuk përputhen me etiketën, madhësinë dhe formën e Sputnik V origjinale. Ndërkohë,Rusia nxitoi ta bëjë menjëherë të qartë se këto janë vaksina false, dhe se sipas Moskës ato janë pjesë e një operacioni“provokimi” nga ana e Perëndimit për të dëmtuar globalisht imazhin e Sputnik V.
Fondi Rus i Investimeve Direkte,vuri në dukje se në flakonit e 6 mijë dozave të kapura, kishte gabime të dukshme drejtshkrimore në shkrimin e gjuhës ruse. Ndërkohë, në llogarinë zyrtare të Sputnik V në Twitter, ishte shkruar se procedura e transportit kishte shkelur të gjitha hapat e sigurisë.
Megjithatë, është konfirmuar destinacioni i këtyre ilaçeve të rreme:ato supozohej se kishin mbërritur me një aeroplan privat në San Pedro Sula, qyteti më i populluar i Hondurasit. Trafikimi i vaksinës false Sputnik V, ashtu si ai i barnave të tjerë, është tashmë një problem serioz në kontinentin Afrikan, por jo vetëm.
Muaj më parë, Komisioni Evropian ngriti alarmin mbi shpërndarjen paralele të vaksinave anti-Covid-19 në tregun e zi. Zëdhënësi Erik Mamer, foli mbi fillimin e monitorimit nga afërt të këtij fenomeni, së bashku me Zyrën Evropiane të Kundër Mashtrimit.
Bëhet fjalë për një fitim prej rreth 2.6 miliardë eurosh për 407 milion doza vaksine. Paralajmërimi erdhi pas deklaratave të kryeministrit të Republikës Çeke, Andrej Babis, mbi tregtimin e vaksinave AstraZeneca përmes ndërmjetësve si një palë e tretë.
Tani shteteve po u bëhet thirrje që të kontrollojnë origjinën e barnave, dhe të raportojnë tek autoritetet përkatëse çdo parregullsi. Organizata Ndërkombëtare e Policisë Kriminale (Interpol), ka dhënë alarmin global ndaj forcave policore të 194 vendeve anëtare, duke u kërkuar atyre që të jenë të përgatitura të veprojnë kundër rrjeteve të krimit të organizuar që po veprojnë në tregun e zi për vaksinat, si fizikisht ashtu edhe në internet.
“Ndërsa qeveritë kanë nisur shpërndarjen e vaksinave në popullatë, organizatat kriminale po përgatiten tëinfiltrohen ose të ndërpresin zinxhirët e furnizimit”- thuhet në një deklaratë. Për më tepër, ata do të përqendrohen në qendrat e magazinimit dhe shpërndarjes. Kërkesa e lartë, e shoqëruar me sasitë e kufizuara të furnizimeve, i ka kthyer vaksinat në “arin e lëngshëm” për kriminelët.
Për ta shmangur këtë fenomen, Interpol ka prezantuar një protokoll sigurie, që është bërë një referencë për oficerët e policisë në vijën e parë të frontit në të gjitha vendet e përfshira. Interpol ka raportuar se doza të vaksinave anti-Covid 19 (me origjinë dhe vërtetësi të panjohur) mund të gjenden tashmë në Deep Web për rreth 150 euro.
Europol po gjurmon edhe rrugëtimin e flakonëve bosh, të cilët më pas mbushen me ndonjë substancë, dhe shiten si vaksina. Liza Forte, specialiste e sigurisë kibernetike në“Red Goat”, deklaroi për “New York Times” se vaksinat “janë për momentin pasuria më e vlefshme”. “Sigurisht, që kjo gjë tërheq kriminelët kibernetikë shumë të aftë, grupe kriminale, madje edhe aktorë shtetërorë”- thekson ajo.
Kompania e sigurisë kibernetike “Check Point”, ka paralajmëruar se janë identifikuar 340 reklama në 34 faqe në internet për shitjen e vaksinave të paligjshme kundër Covid-19. Një muaj më parë, ishin identifikuar vetëm 8 faqe.
Disa nga këto platforma, ofrojnë mundësinë e pagesës me monedhën dixhitale Bitcoin, e cila lejon fshehjen e gjurmëve. Sipas raportit të Check Point, çmimi fillestar për një vaksinë ishte 250 dollarë, ndërsa tani i kalon 1000 dollarë.
Ndër shkaqet e shtimit të ofertave në tregun e zi, është ngadalësimi i fushatave të vaksinimit në shumë vende. “Njerëzit nuk duan të presin javë apo muaj për të marrë vaksinën nga qeveria e vendit të tyre”- pretendon kompania.
burimi-https://formiche.net/2021/03/mercato-nero-vaccino
Përshtatur për Tirana Today
