Drejtuesi i Fondacionit “Fundjavë Ndryshe” Arbër Hajdari, sot ishte i ftuar në emisionin “Rudina” në “Tv Klan”, prej ku foli për një projekt të përmasave të mëdha.
Bëhet fjalë për Qendrën e Solidaritetit “Fundjavë Ndryshe”, punimet e së cilës kanë nisur në datën 26 maj të këtij viti.
Siç theksoi Hajdari, projekti është jashtëzakonisht i madh dhe synimi kryesor i tij është t’iu vijë në ndihmë njerëzve në nevojë.
“Është një projekt që përfshin fuqizimin e rolit të të rinjve, shkollë profesionale, biblioteka, librari, salla konferencash etj”, tha ai.
“Qendra e Solidaritetit” do jetë qendra më e madhe sociale në Ballkan dhe për të gjithë ata që nuk e dinë vendndodhjen e saj, Hajdari sqaroi se është në fillim të Rrugës së Arbrit.
Ai pohoi se një nga repartet më të mëdhenj ushtarakë që ka pasur vendi, dita-ditës po transformohet në një qendër sociale për t’i shërbyer grupeve vunerabël.
https://www.instagram.com/p/B3e2IpDAIpz/
Një vlerë e shtuar për zonën ku po zhvillohet projekti janë edhe ullinjtë 900-vjeçarë: “Ullinjtë janë të Principatës së Arbrit, janë 900-vjeçarë. Aty në ato troje ka jetuar populli i Arbrit dhe janë ullinj të mbjellë nga ata. Ne jemi kujdesur që të ruajmë secilin prej tyre sepse i përkasin historisë së vendit tonë, prandaj kanë kaq shumë rëndësi.
Objektet e para që janë restauruar janë sallat e konferencave, të cilat i kemi lënë në dispozicion për të rinjtë shqiptarë që kanë dëshirë të realizojnë një aktivitet të caktuar.
Kemi menduar një shkollë profesionale e cila do të jetë pa para. Në bashkëpunim me bizneset më të mëdha në vend po bëjmë rakordime se cilat janë zanatet që kërkohen. Të gjithë personat që do të vijnë për të qenë pjesë e shkollës do të kenë edhe një kontratë paraprake pune… në mënyrë që kur të mbarojnë shkollën, direkt të futen në punë”.
Në vijim, Drejtuesi i Fondacionit rrëfeu se i gjithë aktiviteti financiar i “Fundjavë Ndryshe” kalon përmes Shteteve të Bashkuara të Amerikës: “Ne jemi regjistruar atje si organizatë internacionale. Qeveria amerikane i njeh fondacionet pa asnjë lloj tarife”.
Po ashtu Hajdari ndau një mesazh që i atribuohet të gjithë të rinjve shqiptarë: “Mos vidhni ide, mos vidhni ëndrra dhe mundohuni që t’i realizoni ëndrrat tuaja në këtë vend. Unë isha një prej atyre që ëndërrova, dështova dhe prapë nga fillimi e fillova, ama atë që doja e realizova. Ky vend pavarësisht se ka të mirat e të këqijat e veta, këtu mund t’ia dalësh. Mos të mendojë asnjë njeri që jashtë vendit është e kollajtë. Atje do jesh i huaj gjithmonë. Kurse këtu, je në vendin tënd!” /TIRANA TODAY
