Gjykata e Posaçme e Apelit ka lënë në fuqi vendimin e shkallës së parë për sekuestrimin e pronave të presidentit të “Yldon Media Group”, Ylli Ndroqi.
Bëhet fjalë për 26 pasuri të Ndroqit, të cilat janë sekuestruar. Avokati i Ndroqit, Alban Qafa e cilësoi si të padrejtë vendimin, pasi sipas tij, nuk janë marrë parasysh provat që ata kanë dorëzuar ditën e djeshme.
Më 1 gusht 2020, Gjykata e Posaçme kundër Krimit dhe Korrupsionit vendosi të pranojë kërkesën e dy prokurorëve Vladimir Mara dhe Dritan Prenci për të vendosur në sekuestro 26 pasuritë e Ndroqit dhe familjarëve të tij.
Ndër pasuritë e sekuestruara janë 7 troje, 5 automjete luksoze dhe Mercedezi me të cilin lëvizte biznesmeni Nroqi i bllokuar tashmë nga policia e Tiranës, dy apartamente, 100.000 m2 pyje, 4 kompani me 100 % aksione dhe 7 kompani me aksione të përbashkëta. Sipas kërkesës së hetuesve depozituar në gjykatë, më 21 Korrik 2020 ata kishin regjistruar procedimin penal ndaj Ndroqit në zbatim të ligjit antimafia, pasi në vitin 1998 dhe vitin 2015 Ndroqi ishte arrestuar dy herë si person i dyshuar për përfshirje në trafikun e heroinës.
