Në një komunikim online përmes Facebook-ut, një prej qytetarëve i është ankuar kryeministrit Rama për indeksimin e pensioneve për herë të dytë. Sipas qytetarëve, indeksimi i pensioneve në këtë normë, nuk është e mjaftueshme për të përballuar rritjen e çmimeve të ushqimeve. Këtë fakt e ka pranuar edhe kryeministri Rama, i cili u shpreh se rritja e pensioneve nuk është asnjëherë e mjaftueshme. Ai tha se rritja e pensioneve është më e madhe se sa më parë. Duke qëndruar në të njëjtën linjë, Rama shtoi se kanë bërë dy indeksime, një në muajin prill dhe tjetrin, duke nisur nga muaji tetor, për t’iu gjendur pensionistëve për të përballuar goditjen nga inflacioni në ushqimet bazë.
“Kjo është një çështje shumë sensitive, është një çështje e shqetësimit tim të përditshëm, si t’u gjendemi më pranë. Sado ne t’i ngremë pensionet, asnjëherë nuk do mund t’ia themi vetes, që kemi bërë mjaftueshëm. Por fakti është se ne kemi ndërhyrë për herë të parë në gjithë historinë e këtyre 30 viteve për të riindeksuar pensionet dy herë brenda një viti. Po t’i referohemi situatës në aspektin e numrave, ne kemi një rritje afro 10 përqind krahasuar me më parë.
Kemi bërë dy indeksime, një në muajin prill dhe tjetrin, duke nisur nga muaji tetor që t’i gjendemi pensionistëve për të përballuar goditjen nga inflacioni në ushqimet bazë. Ajo që është fakt, është që pensioni është rritur me 15 mijë lekë në krahasim me atë ku ishte.
Është shumë më shumë se ajo që ishte, në krahasim me një situatë të tillë. Çdo rritje është e rëndësishme.
Shqipëria po e mban nën një kontroll relative inflacionin në raport me vendet e tjera. Në rajon kemi nga Kosova 13%, tek Serbia 13 %. Në totalin e vetë, në 8 muaj, inflacioni në Shqipëri është sërish një shifror, 6 %. Nuk janë shifra të mia, janë të Eurostat. Patjetër që duhet bërë më shumë, por ka dhe një element tjetër, rritja që vjen me valën e dytë të mbështetjes, është një rritje e qëndrueshme, pra nuk është një paketë që ka një afat. Konsolidohet më tutje në vitin e ardhshëm, ku do të bëjmë indeksime”.
