Në “Wembley” është zhvilluar një ndeshje fantastike mes Anglisë dhe Kroacisë, ku vendasit kanë arritur të përmbysin gjithçka vetëm në 15’ minutat e fundit. Ky rezultat u jep “Tre Luanëve” kryesimin e grupit 4 të League A dhe që i mundëson kualifikimin në fazën finale të Nations League.
Anglia e nis mjaft mirë ndeshjen duke krijuar disa raste mjaft të mira për shënim me Sterling dhe Harry Kane, por portieri kroat, Kaliniç ndalon çdo top që shkon drejt portës. Kroatët përgjigjen me Perisic, i cili del i vetëm përballë portierit Pickford, por topi përfundon mbi traun e portës.
Pas pushimit ndeshja bëhet më e barabartë, dhe në një nga aksionet e paktë në zonën kundërshtare, Kroacia arrin të zhbllokojë rezultatin në minutën e 57’ me golin fantastik të Kramaric. Anglia mundohet të reagojë menjëherë, por e ka shumë të vështirë të depërtojë në zonën kroate dhe e vetmja mënyrë që vendasit tregohen të rrezikshëm janë goditjet standarde.
Dhe në minutën e 78’ anglezët shfrytëzojnë më së miri një goditje këndore duke shënuar golin e barazimit me Jesse Lingard. Ndeshja mbetet e hapur pasi skuadrave u duhet fitorja për të avancuar në finalet e kompeticionit.
Kroacia ka një mundësi shumë të mirë me Vida, por goditja e tij me kokë ndalet në vijën fatale nga Lingard. Në minutën e 86’ ishte Harry Kane ai që shtyu topin në rrjetë pas krosit të bukur nga e majta nga Chilwell duke përmbysur rezultatin.
Kroacia mundohet të bëjë diçka në minutat e fundit të takimit, por vendasit e ruajtën me zotësi avantazhin duke marrë një rezultat të madh.
