Anglia është rikthyer të zhvillojë një ndeshje të madhe dhe të dhurojë spektakël përballë Spanjës, duke e mposhtur 3-2. “Tre Luanëve” u janë dashur 37’ minuta për të ‘bombarduar’ portën e De Geas me Sterling dhe Rashford. Me këtë triumf të bukur, Anglia i afrohet Spanjës që ruan vendin e parë në grupin 4 të League A.
Ishte Raheem Sterling, i cili kishte 1102 ditë pa shënuar gol me përfaqësuesen, ai që zhbllokon rezultatin në minutën e 16’.
Në minutën e 30’ vjen goli i dytë me Marcus Rashford. Gol i cili nis nga këmbët e portierit Pickford dhe Kane bën një lëvizje fantastike për të nxjerrë Rashford të vetëm përballë De Geas dhe shënon sërish.
Ndërsa tetë minuta më pas vjen shuplaka e tretë me Sterling, për të cilin asiston sërish Kane duke vulosur një pjesë të parë superiore të ishullorëve.
Pas pushimit Spanja mundohet të reagojë dhe gjen golin e parë me sulmuesin e Borussia Dortmund Paco Alcacer. Spanja merr zemër dhe sulmon më tepër ndaj një Anglia që nuk luan me freskinë e pjesës së parë, diçka e kuptueshme duke parë avantazhin e krijuar.
Spanja tregon shpirt gare, nuk u dorëzua por doli pas pushimit duke luftuar për çdo top. Ndeshja mbeti e bukur dhe emocionuese deri në sekondat e fundit. Sergio Ramos ngushton rezultatin në sekondat e fundit të lojës, por ishte tepër vonë, Spanja duhet të pranojë humbjen.
Ndërkohë Islanda nuk ka replikuar të njëjtën paraqitje si ndaj Francës disa ditë më parë duke u mposhtur brenda në shtëpi nga Zvicra me rezultatin 2-1. Zvicra me këtë fitore kryeson grupin 2 të League A, me pikë të barabarta me Belgjikën.
Bosnje Herzegovina nuk ka zhgënjyer ndaj Irlandës së Veriut duke fituar 2-0 në shtëpi. Edhe ajo kryeson grupin 3 të League B.
Estonia dhe Hungaria kanë barazuar 3-3 dhe mbeten në vend numëro në renditjen e grupit 2 të League C. Ndërsa Finalnda ka befasuar Greqinë me fitoren 2-0. Ajo tani është në krye të grupit me katër fitore në po aq ndeshje.
Bjellorusia dhe Moldavia kanë ndarë nga një pikë në barazimin 0-0 të grupit 2 të League D. Ndërsa Luksemburgu nuk ka falur ndaj San Marinos duke fituar bindshëm 3-0. Tashmë Luksemburgu ka marrë kryesimin e grupit me nëntë pikë.
