Një ditë përpara finales së “Euro 2020” mes Anglisë dhe Italisë, janë shtuar edhe parashikimet se ç’mund të ndodhë. Pritshmëritë janë të mëdha për aktin e fundit të turneut europian, që do të vendosë përballë ekipet e Southgate dhe Mancini.
Jamie Carragher, mbrojtësi historik i Liverpool dhe ekipit kombëtar anglez, duke folur për “Sky Sports”, tha se ishte shumë i sigurtë se si do të përfundojë finalja e së dielës. Ai ka parashikuar penalltitë dhe më pas fitoren e Anglisë.
“Ekipi ka punuar shumë me 11-metërshat, kështu që duhet vënë në praktikë ajo që është bërë në stërvitje. Në çdo rast nuk mendoj se do të ketë shumë gola kjo ndeshje. Italia është shumë e fortë në mbrojtje. Personalisht mendoj se ndeshja do të përfundojë 1-1 dhe pastaj do të shkohet te penalltitë dhe në atë rast Anglia do të fitojë. Mendoj se është finalja e duhur për këtë kompeticion. Italia dhe Anglia ishin dy skuadrat më të mira. Mendoj se do të jetë spektakolare”, tha Carragher.
Ndërkaq, tifozët anglezë janë bërë viral kohët e fundit me shprehjen e famshme “It’c coming home’’ duke shpresuar në një triumf të “3 Luanëve” në finale.