Grupimi ‘Për PD-në’ ka dalë në një konferencë për media, ku kanë listuar arsyet pse Basha fitoi një mandat të tretë në krye të PD-së, përmes një procesi me shkelje të mëdha. Grupi ‘Për PD-në’ denoncoi një sërë shkeljesh statutore, që sipas tyre janë bërë, ndërsa procesin zgjedhor e cilësojnë si të pabarabartë, të padrejtë dhe me shkelje të rënda. Edith Harxhi, e cila ishte një prej kandidatëve për kryetar të PD-së, nënvizoi faktin se mijëra anëtarë të PD-së nuk u lejuan të votonin.
Kandidatja për kryetare e Partisë Demokratike, Edith Harxhi, u shpreh se zgjedhjet e 13 qershorit nuk ishin as zgjedhje, dhe as zgjidhje dhe jashtë çdo standardi. “Këto zgjedhje nuk ishin zgjedhje, nuk ishin as zgjidhje, ishin jashtë çdo standardi vendor, e jo më ndërkombëtar për t’u quajtur zgjedhje. Ne do të vazhdojmë të punojmë brenda PD-së, për të ringritur PD-në nga ‘A’-ja për ta rithemeluar. Nuk ka përfunduar më datën 13 qershor, kjo do të vazhdojë dhe ky grup ka të njëjtin qendrim. Këto nuk ishin zgjedhje. Nëse vazhdon që të quhet kryetar partie, le të vazhdojë të jetë”, u shpreh Harxhi.
Ajo shtoi më tej se janë përjashtuar 28 mijë anëtarë të Partisë Demokratike, dhe kjo është shkelja me madhe e këtyre zgjedhjeve. “Listat e anëtarësisë nuk u vunë në dispozicion të kandidatëve. Kjo i mohoi të drejtën e votës dhjetëra mijëra demokratëve. Përjashtimi i 28 mijë anëtarëve të PD-së, është shkelja më e rëndë e këtyre zgjedhjeve. Ka pasur nga ato që kanë shkuar me kartë anëtarësisë të lëshuara nga Azem Hajdari dhe nuk janë pranuar. Pra përveç listës së shkurtuar nga 106 në 75 mijë, ka pasur një mungesë shumë të madhe të emrave në listë. Në kundërshtim me çdo normë të Kodit Zgjedhor janë bërë anëtarë të rinj. Disa kanë votuar vetëm me një kontabilet për të votuar. Në disa qendra votimi ka pasur raste kur kanë votuar pa kartë anëtarësie. Audituesit elektronik, përfaqësuesit e kandidatëve nuk janë lejuar të shikojnë nëse ka modifikime në sistem. Në 90% të rasteve vëzhguesit janë kërkuar që të rrinë larg tavolinës së komisionit. Ka pasur raste kur vëzhguesit janë kërcënuar nga anëtarët e komisionit. Disa janë përjashtuar nga komisioni. Nuk është zbatuar rregullorja në lidhje me modalitetet e procesit zgjedhor”, tha Harxhi.
Nishani: Basha sot përfaqëson minorancën në PD
Ish-presidenti Bujar Nishani, pjesë e ‘Grupimit për PD’-në, tha se Basha u votua nga më pak se 30% e anëtarësisë. “’Është një shqetësim jo vetëm i joni. Besoj se është një shqetësim i shoqërisë. Po evidentojmë se kemi probleme thelbësore me zgjedhjet në këtë vend. Ngrihet pushteti shfrytëzon të gjithë fuqinë e tij, i vjedh zgjedhjet në favor të pushtetit të vetë. Bëhen zgjedhjet në parti, ngrihet i pushtetshmi brenda partisë dhe i vjedh zgjedhjet në favor të pushtetit të tij.
Në Korçë, Bashkia Korçës ku patën mundësi kandidatët të kontrollin pjesërisht pushtetin rezultoi se fitoi vetëm 70%. Në Devoll kryetari i PD deklaroi publikisht se ndihet i turpëruar dhe e bojktoi procesin e votimit, pasi anëtarëve u mohua pjesëmarrja. 50% e anëtarësisë fshihet. Një media ka treguar si hidhen 7 fletë votimi në kuti dhe kjo ka ndodhur kudo. Sot përfaqëson minorancën e PD-së më pak se 30% të anëtarësisë së PD-së”, tha Nishani.
Imami: Basha i mban të fshehta listat e partisë
Arben Imami, ish ministër i PD-së, shigjetoi Bashën se i mban të fshehta listat e partisë sikur PD të ishte organizatë terroriste.
“Në vitin 2017, z. Basha ka marrë 25000 vota më pak se në vitin 2021 dhe arsyeja është se zgjedhjet e para 4 viteve kanë qenë totalisht të montuara. Këto zgjedhje janë përtej njohjes apo mosnjohjes. Kandidatët nuk kanë pasur listat. Edhe sot pasi kanë mbaruar zgjedhjet, kandidatët nuk kanë listat e partisë. I them z. Basha që ti nuk je kryetar i një subjekti terrorist, komunist, që i mban të fshehta listat e partisë. Në një parti si PD, nuk mund të ketë lista të fshehta të partisë”, tha Imami.
