Analisti Andi Bushati është shprehur në një intervistë për emisionin “Now” në “Euronews Albania”, se për momentin e shikon të pamundur bashkimin e Partisë Demokratike. Sipas tij, në politikë nuk mund të ulesh pa kushte.
“Bashkimi i PD-së për momentin duket mision i pamundur. Çelësin e gjej te kjo pa kusht. Nuk mund të ulesh në politikë pa kushte. Unë nuk do pranoja kurrë të negocioja me një grup që mban një gjë që i shërben Edi Ramës. Secila palë në politikë, kur shkon në bisedime shkon me kushte të caktuara”, deklaroi ai.
Pas mbledhjes me grupin e PD-së, deputeti demokrat, Enkelejd Alibeaj deklaroi se partia duhet të dalë me një kandidat të vetëm, për çdo Bashki në zgjedhjet e ardhshme vendore.
Edi Paloka dhe Gazment Bardhi, të cilëve dy grupet kundërshtare në PD u kanë besuar rolin e negociatorëve, u ulën për 30 minuta përballë njëri-tjetrit për të gjetur rrugën që do t’i çojë drejt daljes me një kandidat. Pas takimit, asnjëri nuk shfaqi nota optimizmi. Negociatori i Berishës, Edi Paloka sqaroi se mungesa e entuziasmit, nuk lidhej me mungesën e vullnetit për t’u bashkuar.
