Analisti Andi Bushati deklaroi se nuk do të jetë në shesh më 12 nëntor. “Unë nuk dal kurrë në manifestime, sepse ose do bësh vëzhguesin, ose do bësh pjesmarrësin. Unë me ata gazetarë që duhet të jenë edhe protagonistë, edhe analizojnë mbrapa nuk shkon”, u shpreh Bushati, në studion e “Now” në “Euronews Albania”.
Bushati thotë se Edi Rama nuk i trembet protestës së opozitës, pasi i ka në dorë të gjitha pushtetet. Sipas tij, një pjesë të ‘meritës’ në këtë vetësiguri të Ramës e ka edhe media.
“S’ka asnjë arsye që t’i trembet protestës. Protestës mund t’i trembet Macron. Protestat kanë vlerë në një sistem demokrat, ku mund të thyesh edhe ndonjë xham, të shash edhe qeverinë por pjesa tjetër e shoqërisë do funksionojnë njësoj të nesërmen.
Një njeri që i ka të gjitha valvulat e shoqërisë në dorë, s’i trembet asgjëje. Ka disa arsye pse Rama s’e ka frikë protestën se televizionet do t’i shtojnë qilima. Në një vend ku një njeri i kontrollon të gjitha, nuk ka frikë nga protestat”, tha Bushati.
7 kandidatët që garojnë në primaret e Partisë Demokratike për Bashkinë e Tiranës, u thirrën dje në një takim në selinë blu, nga Sali Berisha. Mbledhja u thirr nga Berisha për të kërkuar nga kandidatët mobilizim edhe për protestën e 12 nëntorit.
Nga ana tjetër, njerëzit e Berishës kanë nisur shpërndarjen e fletushkave nëpër xhamat e makinave të qytetarëve, të cilëve u bëhet thirrje të marrin pjesë në protestën e 12 nëntorit.
