Pas shpalljes së rezultateve të zgjedhjeve përfundimtare nga Komisioni Zgjedhor i Kosovës (KQZ), pritet që në afat sa më të shpejt kohor të caktohet seanca konsituive e Kuvendit për krijimin e institucioneve në vend.
Mirëpo, sipas rregullores dhe pikës 9 të punës parlamentare të Kuvendit thuhet se këtë seancë e udhëheqë deputeti apo deputetja më e vjetër në moshë, e në këtë rast i bie që është partia Vetëvendosje si grupacion më i madh politik.
Ndërkaq, njohësi i çështjeve juridike njëherësh ish-kryetari i KQZ-së, Mazllum Baraliu ka shpjeguar këtë situatë në bazë të dy neneve të Kushtetutës siç janë 66 dhe ai 67.
Pra, neni 66 thotë se presidenti e ka për detyrë që ta thërret seancën konstitutive të Kuvendit, por në rast se nuk e bënë atëherë Kuvendi mblidhet pa pjesëmarrjen e presidentit dhe seancën e udhëheqë deputeti më i vjetër i grupacionit më të madh politik, që është Partia Vetëvendosje.
Ndërsa, neni 67 i Kushtetutës paragrafi i 2 thotë se kryetari i Kuvendit propozohet nga grupi më i madh parlamentar, e ky grup është zakonisht i partive politike e në këtë rast më i madhi pas rezultatit të zgjedhjeve është grupi i Lëvizjes Vetëvendosje i cili si subjekt politik i ka 32 apo 33 deputet, raporton Indeksi.
Prandaj këtij paragrafi Kryetari i Kuvendit propozohet nga grupi më i madh parlamentar dhe zgjedhet me shumicën e votave të gjithë deputetëve të Kuvendit të Kosovës.
Më tej, Baraliu ka treguar se vendi është në një situatë paralëvizje duke pasur para vete dy situate të ndryshme.
Ai thotë se për krijimin e Qeverisë mund të shikohet edhe vendimi i Gjykatës Kushtetuese i vitit 2014.
“Mirëpo, situata aktuale në Kosovë është pak ambivalente (paralëvizje) për arsye se kemi edhe një vendim të Gjykatës Kushtetuese të vitit 2014, ku është pak më ndryshe për shkak të krizës që ishte në atë kohë ndërmjet VLAN-it dhe PDK-së. Ku ky i pari patë marrë vendim që ta propozojë kryetar Kuvendi, Isa Mustafën dhe e bënë një kërkesë në GJykatën Kushtetuse për tu marrë vendimi që partisë më të madhe apo koalicionit parazgjedhor i takon miratimi i propozimit për zgjedhjen e kryetarit të Kuvendit. Pra kemi një paralëvizje në mes të paragrafit 2 të nenit 67 të Kushtetutës dhe vendimit të Gjykatës Kushtetuse të vitit 2014”, është shprehur Baraliu.
Në fund ai ka thënë se mund të ketë ‘blloqe’ të ndryshme politike varësisht se si do të veprojnë Grupet Parlamentare nga këto nene përkatëse apo edhe këtij vendimi të Gjykatës Kushtetuse.
“Duhet të shohim si do të veprojë koalicioni PAN i cili është i pari në zgjedhjet e 11 qershorit. Pastaj eventualisht Vetëvendosja nëse pretendon që të zbatohet paragrafi 2 i nenit 67 që ajo si grup më i madh parlamentar ta propozojë kryetarin dhe jo PAN-i, gjë kjo e cila do të shkaktonte sigurisht mospërputhje dhe ndoshta përplasje në mes të grupacioneve e blloqeve të ndryshme politike”, ka përfunduar Baraliu.
