Analisti Fatos Lubonja thekson se asgjë nuk ka ndryshuar me marrëveshjen e re politike Rama- Basha. Ai e cilëson aksionin politik të kreut të Partisë Demokratike si të dështuar duke shpjeguar se Basha u shkri me “Republikën e Vjetër” të kryeministrit Rama.
“PD ishte në çadër me një premtim, kontestim, denoncim, të gjitha bashkë. Nga denoncimi tek premtimi. Denoncimi për “Republikën e Vjetër” dhe premtimin për “Republikën e Re”. Në atë çadër krijonte përshtypje për një lëvizje popullore që nuk ishte thjesht militantizëm. Shpesh herë janë akuzuar dhe mediat, që janë fokusuar tek Basha, dhe jo tek figurat e reja. Në këtë aspekt, çadra dështoi në kuptim e qeverisë teknike”, – tha Lubonja.
Lubonja vuri në dukje se projekti politik midis kreut të PD-së dhe kryeministrit më ka më shumë synim për të nxjerrë jashtë skenës politike partitë e vogla.
“Kemi një lloj paqartësie se sa ky projekt i dy partive të mëdha synon për t’i nxjerr jashtë loje partitë e vogla. A duhet Shqipëria të ketë vetëm dy parti të mëdha, pra a duhet të shkojmë tek modeli amerikan? Modeli amerikan nuk ka një lider të përjetshëm. Ky model është tjetër gjë. Unë them se jo. Kjo është loja e dy të mëdhave, për të eliminuar të voglat. Duke filluar nga LSI. Deri sa eliminuan LSI, të voglat janë më lehta”, – u shpreh Lubonja në rubrikën “Opinion” në “News 24”
Politika si biznes
Duke iu referuar sjelljes së aktorëve politikë, Lubonja saktësoi se partitë politike janë kthyer në biznese që ndajnë të mirat publike me njëra-tjetrën.
“Mosmarrëveshjet dhe pabesi është e gjithë politika shqiptare. E para ndaj elektoratit. Një mosmarrëveshje me këta aleatët e vegjël nuk na çudit. Ashtu siç nuk na çudit që të gjendet një marrëveshje. Këto e kanë kthyer në biznes politikën. Pluralizëm pa vizione të ndryshme për vendin dhe me konfliktualitet, nevojë për të ndarë tortën”, pohoi ai.
Ekonomia dhe politika pa vizion
Lubonja bëri edhe një parashtrim mbi raportin e politikës me ekonominë. Ai e cilësoi këtë marrëdhënie si kriminale, e cila ka venitur çdo vizion mbi zhvillimin e ekonomisë dhe të ardhmen e vendit.
“Ekonomia është ajo që përcakton edhe politikën. Ekonomia dominuese në këto 4 vite ishte ajo e kanabisit dhe kriminale. Ekonomia e kanabisit nuk ka lidhje me shtetin. Partitë politike nuk kanë pika të cilat thuhet se ato ku do të fokusohen për fuqizimin e ekonomisë. Në vend nuk ka një ekonomi reale, paratë e ekonomisë janë hedhur në industrinë e ndërtimit dhe të shërbimeve por asgjë nuk është bërë për industrinë prodhuese. Turizmi është shkatërruar nga industria kriminale e ndërtimit e cila ka shkatërruar mjedisin. Bregdeti është zaptuar me ndërtime uzurpuese dhe me vila për politikanët, të cilat i quajnë pasuritë e tyre fshatra turistikë”, përfundoi Lubonja.
