Analisti gjerman, Bodo Weber është shprehur se Kosova dhe Serbia duhet të angazhohen që të mos bllokojnë njëra-tjetrën në rrugën drejt BE-së.
“Që nga fillimi ishte e qartë se në fund të dialogut ndërmjet Beogradit dhe Prishtinës duhet të arrihet një lloj marrëveshje e detyrueshme për normalizimin e marrëdhënieve”, ka thënë Weber për REL.
Më tej, analisti shtoi se Serbia është shumë më afër BE-së se Kosova, gjë që do të thotë se shteti serb duhet të angazhohet që të mos e bllokojë anëtarësimin e Kosovës në BE, skenar ky që do të mundësonte bashkimin e saj me BE-në.
“Duke pasur parasysh faktin se Serbia është shumë më afër anëtarësimit në BE se Kosova, kjo në radhë të parë do të thotë se Serbia do të duhet të angazhohet të mos e bllokojë anëtarësimin e Kosovës në BE. Ky është një skenar sipas të cilit Serbia do të bashkohet me BE-në si një anëtare me të drejta të plota Bashkimit, prandaj, ajo nuk do të jetë në gjendje për të ndryshuar politikën dhe hyrjen e Kosovës në BE sa më shpejt që Kosova i plotëson kushtet për këtë”, ka thënë më tutje ai për Radion Evropa e Lirë.
Sipas Weber, “në parim nuk është asgjë e habitshme”, që presidenti i Serbisë, Aleksandër Vuçiç njoftoi gjatë ditës së djeshme opinionin e brendshëm se Serbia, para se t’i bashkohet BE-së, duhet që të nënshkruajë një dokument ligjërisht detyrues për normalizimin e marrëdhënieve me Prishtinën.
