Kryeministri Edi Rama aktualisht po zhvillon një takim me ambasadorët e akredituar në Shqipëri, me të cilët do të diskutojë për amnistinë fiskale. Edhe një herë tjetër, kryeministri Rama u shpreh mëse i vendosur për të vijuar me nismën e qeverisë për amnistinë fiskale dhe penale për paratë e shqiptarëve. Burimet bëjnë me dije se ky takim do të jetë për të informuar ambasadorët, për draftin e amnistisë që është hedhur për konsultim.
Shumë vende të BE-së janë shprehur kundër amnistisë fiskale. Por kryeministri Edi Rama është shprehur i vendosur për ta çuar përpara këtë nismë. Vetëm një ditë më parë, Rama tha se amnistia fiskale do të miratohet dhe se qeveria nuk është tërhequr, por është në fazën e konsultimeve.
Kryeministri ka theksuar se amnistia fiskale nuk do të formalizojë paratë e fituara nga veprimtari kriminale, por kursimet e emigrantëve shqiptarë në botë të cilët kanë punuar “në të zezë” apo të pasiguruar.
Amnistia fiskale dhe penale është nismë ligjore e ndërmarrë nga qeveria shqiptare për të falur të gjitha gjobat, kamatëvonesat e pasurisë që deklarohet, nëse kryhet regjistrimi i pasurisë së disponuar në 30-vjeçarin e fundit, të kryera deri në datën e hyrjes në fuqi të ligjit. Personave që aplikojnë për amnisti fiskale, u ruhet anonimati dhe nuk i fillojnë procedurat e ndjekjes penale.
