Hedhja me parashutë nga lartësitë e mëdha, është një akt që kërkon shumë guxim, dhe që e bëjnë pak njerëz në botë. Por disa prej tyre, kanë ndërmarrë gjeste edhe më ekstreme.
Amerikani Luke Aikins, theu të gjitha rekordet në vitin 2016, duke u hedhur pa parashutë nga një lartësi prej 8250 metrash. Aikins, ishte sigurisht një profesionist në këtë fushë. Deri në atë moment ai kishte kryer rreth 18.000 hedhje me parashutë.
Hedhja e tij në shkretëtirën e Kalifornisë, u transmetua direkt nga televizoni amerikan Fox News. Ai ishte përgatitur për 18 muaj me radhë për atë hedhje spektakolare. Kolegët këmbëngulën, që ai të mbante një parashutë në rast emergjente, por Luke nuk pranoi.
Pasi u hodh nga avioni, ai vuri maskën e oksigjenit, kur zbriti në lartësinë 6 mijë metra. Shpejtësia e rënies drejt një rrjete me përmasa katrore 30 me 30 metra, ishte mbi 240 km/h. Pavarësisht frikës së bashkëpunëtorëve, gruas dhe djalit të tij të vogël, që e prisnin poshtë, Luke e kreu hedhjen me sukses./ Tirana Today
