Ambasada amerikane në Shkup do të dhurojë pajisje për Policinë kufitare dhe Drejtorinë e doganave, si dhe për Drejtorinë për siguri nga rrezatimi. Këto pajisje arrijnë vlerën 207.000 dollarë amerikanë, ku përfshihen pajisje për parandalim të krimit, kompjuterë, automjet për patrullim dhe automjete për terren.
Në njoftimin e ambasadës thuhet se dhurimi i pajisjeve bëhet në mënyrë që të përmirësohet kapaciteti i shërbimeve kufitare të Maqedonisë për të zbatuar kontroll profesional në vendkalimet kufitare.
“Programi për kontroll të eksportit dhe sigurisë kufitare (EXBS) dhe Programi ndërkombëtar për ndihmë në trajnim për hetime penale (ICITAP) pranë Ambasadës së SHBA do të dhurojë pajisje për përmirësim të kapacitetit të shërbimeve kufitare të Maqedonisë për të zbatuar kontroll profesional të kufijve dhe operacioneve në vendkalimet kufitare. Pajisjet e dhuruara gjithashtu do të përmirësojnë aftësinë e këtyre tre agjensive për të kryer operacione parandaluese në kufi, për të luftuar krimin ndërkufitar dhe terrorizmin, për të detektuar rrezatim, dhe identifikim të armëve për shkatërrim në masë dhe materialeve përkatëse”, njofton ambasada amerikane në Shkup.
Pranim-dorëzimin e mjeteve do ta bëjë të enjten ambasadori i SHBA-ve, Xhes Bejli, në vendkalimin kufitar Bllacë.
