Kontrolli i Lartë i Shtetit ka kallëzuar në prokurori ish-drejtorin e ALUIZNI-t Sarandë, dy ish-përgjegjësve dhe dy specialistë. Këta persona akuzohen për legalizimin e i ndërtimeve pa leje në zonën arkeologjike të Butrintit, pranë rrugës kryesore, pranë vijës bregdetare e pranë lumenjve. KLSH ka audituar aktivitetin e këtij institucioni gjatë gjashtëmujorit të parë të vitit.
KLSH konstaton se për 45 objekte të ndërtuara në zonën historike, turistike dhe arkeologjike A, si dhe për 97 objekte të ndërtura në zonën e mbrojtjes mjedisore “A” Parku Kombëtar i Butrintit. Drejtoria e ALUIZNI-t Sarandë nuk ka administruar dokumentacionin shkresor për skualifikimin ose jo. 1,853 dosje të tjera objektesh janë rikthyer në arshivë, pa u dokumentuar mbi përfundimin apo jo të procedurave të terrenit.
Në 9 raste rezultoi se janë kryer legalizime të objekteve pa respektuar distancat nga brigjet. në 17 raste janë pajisur me leje legalizimi objekte të ndërtuara brenda zonës së mbrojtjes mjedisore “A” Parku kombëtar i Butrintit. Po ashtu, zyrtarët e ALUIZNI-t janë përgjegjës edhe për mosarkëtimin e taksës së infrastrukturës me një vlerë prej rreth 500 mijë dollarësh.
Paralelisht KLSH ka dërguar për ndjekje penale edhe ish kryetarin, Përgjegjësin e Financës dhe një specialist të Komunës Margegaj në Tropojë. Gjatë auditimit të kësaj Komune KLSH ka konstatuar shkelje në fushën e prokurimit publik dhe pagesa të paargumentuara e të pajustifikuara me dokumentacion, të cilat kanë shkaktuar një dëm ekonomik të konsiderueshëm prej 12.5 milionë lekë financave të ish-komunës.
