Grupi Parlamentar i Partisë Socialiste nisi sot procesin e identifikimit të kandidaturës për Kreun e ri të Shtetit. Kreu i grupit parlamentar të PD, Enkelejd Alibeaj, në një deklaratë për mediat për zgjedhjen e Kreut te ri të Shtetit tha se më i rëndësishëm është procesi që sipas tij duhet të jetë transparent e gjithëpërfshirës, “jo i mbyllur në zarf”.
“Do duhet nisur me këmbën e mbarë, duke respektuar Kushtetutën. Procesi duhet të jetë transparent, gjithëpërfshirës, në sytë e shqiptarëve. Ky do duhet të jetë frymëzimi e qasja. Për këtë arsye, e dimë të gjithë cila është procedura.
Të gjithë e dimë që në raundin e katërt e pestë zgjidhte me votat e mazhorancës, kjo s’do duhet përdorur si një mjet për ta futur në zarf e më pas pjesa tjetër të zgjidhi zarfin. Kjo s’do ishte gjë tjetër përveçse cili është qëndrimi real i mazhorancës”.
I pyetur a do shkojë në tryezën e konsultimeve të thirrur nga mazhoranca për kandidaturën për presidentin, Alibeaj tha:
“Grupi parlamentar do të mbajë qëndrimin e vet mbi gjithçka. Tashmë është bërë rutinë mbledhja e grupit parlamentar. Presidenti nuk është i deputetëve, por i shqiptarëve. Kjo duhet të prevalojë mbi gjithçka. Këtë do bëjmë ne. Ne kemi grupin parlamentar të PD. Grupi ynë do të vendosë për qëndrimin dhe procedurat e procesit konsultaltiv”.
