“Po i jepet rëndësi më shumë seç duhet”, kështu e cilëson Robert Aliaj ngjarjen e ndodhur në fshatin Bularat, kur RENEA qëlloi për vdekje Kostandions Kacifas. Në një intervistë ekskluzive për Tirana Today, artisti e quan ngjarjen një provokim.
“Unë besoj që ishte një provokim, i bërë nga njerëz ekstremist. Është një situatë shumë e amplifikuar, më tepër është zhurmë. Nuk është aspak e nevojshme, pa asnjë vlerë. Ata i japin vlerë vetes duke na provokuar neve, ndërkohë ne i japim rëndësi anasjelltas. Sigurisht që është një jetë humane, që të vjen keq.
Mirëpo, këto janë rregullat e lojës. Ai pati një kallash në shtëpi dhe kjo është më e çuditshme. Një njeri që është me probleme psikologjike a është në depresion dhe mund të kuptohet. Por, dikush që ka armë, dihet që shkon me qëllim për të vrarë.”
Racizmin e nxit politika
Pas protestës me thirrje të forta urrejtje nga një grup ekstremistësh grekë, Aliaj thotë se nuk duhet të merren për bazë, pasi grekët janë një popull i mirë.
“Unë nuk besoj në thirrjet nacionaliste as shqiptare e as ato greke. Unë nuk mund të jem anti-grek pavarësisht se disa herë i ironizoj në televizione. Por, ne grekët nuk kemi arsye t’i urrejmë. Ai është një popull shumë i mirë. Kurse shqiptarët komportohen keq dhe orientohen gabim. Disa herë dhe unë e pranoj që jam pak agresiv, por kam vënë re që nuk funksionon ndryshe, nuk marrin vesh. I kemi bërë njerëzit pa mendime.
Ne nuk na shajnë grekët, na shan një grek. Por, ato nuk janë gjithë Greqia. Është si të dalë një shqiptar psikopat e idiot dhe shan grekët. Unë kam jetuar në Greqi dhe kam kaluar jashtëzakonisht mirë. Kam kujtime dhe miq shumë të mirë. Mirëpo, sigurisht që ka racizëm, sepse është politika e tillë që përgatit këtë lloj zullumi.”
Shqiponja në hyrje të Tiranës, tradhti ndaj atdheut
Sipas Aliajt, shqiptarët të cilët indinjohen në situata të tilla, nuk janë patriotë. Përkundrazi ne vuajmë nga një patriotizëm artificial.
“Patrioti shqiptar është nacionalisti. Patriotë shqiptarë janë ata që kanë shqiponjën e deformuar në kuptimin moral. Jo atë shqiponjë që bëra unë, sepse ajo që bëra unë është realiteti.
Patriotizmi i shtirur është ajo shqiponja e salduar me metal që pengon gjithë botën të qarkullojë e të hyjë në Tiranë. Ajo është tradhti ndaj atdheut, që në një autostradë të vendosësh një shqiponjë se e duan UFO-t.
Ajo ka për qëllim vetëm të shkatërroj imazhin e ikonës që kemi neve për simbolin kombëtar. Sepse duke e pasur atë aq të shëmtuar çdo mëngjes, ti fillon e urren. Shqiptarët janë patriotë injorantë. Një patriot është ai që punon mirë dhe zbaton ligjin. Ndërkohë, tek ne patriotë janë këta që po e ndotin Shqipërinë.” TIRANA TODAY
