Albin Kurti, kandidat për kryeministër i Lëvizja Vetëvendosje, është regjistruar sot si deputet në Kuvendin e Kosovës.
Pas regjistrimit, Kurti u shpreh se do të jetë në shërbim të popullit që do ndryshime demokratike për përmirësimin e jetës në Kosovë.
“Sapo e bëra regjistrimin si deputet në Kuvendin e Republikës dhe unë do të jem deputet i popullit që do ndryshime demokratike, ndryshime për drejtësi e zhvillim, për mirëqenie e punësim, për liri e demokraci. Do të jem në krye të detyrës sipas zotimeve tona e nevojave të shoqërisë”.
Gjithashtu, Kurti ka pohuar se do të marrë pjesë në seancën e 3 gushtit, bashkë me deputetët e zgjedhur të Lëvizjes Vetëvendosje, ndërsa ka ritheksuar se kjo parti nuk do e votojë Kadri Veseli si kryetar të Parlamentit.
“Padyshim që gjithë grupi i Vetëvendosjes, përfshirë edhe mua pra 32 deputetë do të jemi të enjten para orës 10:00 në Kuvendin e Republikës.
Të enjten Kuvendi duhet ta zgjedhë një figurë politike që duhet të jetë sa më gjithë përfshirëse e kurrsesi kontroverse dhe ky deputet që bëhet kryetar Kuvendi duhet të jetë shumë më i mirë se ai i Legjislaturës së kaluar”.
