Kryeministri i Kosovës, Albin Kurti, ka reaguar në lidhje me heqjen e taksës dhe vendimit që po ndërmerr Serbia me intensifikim të fushatës së çnjohjeve së pavarësisë së Kosovës. Kurti i bën thirrje Serbisë që të ndalë këtë ofensivë, e po kështu që të heqë dorë nga politikat destruktive ndaj Kosovës.
Apeli i Kurtit nuk ndalet këtu, pasi ai i drejtohet edhe faktorit ndërkombëtarë, që të shtojnë trysninë mbi Serbinë, e të ndërpresë politikën armiqësore ndaj Kosovës.
Statusi
Vullnetit tim të mirë, për heqjen e pjesshme të tarifës në lëndën e parë që importohet nga Serbia, në mënyrë që të krijohen kushtet për rifillim të dialogut dhe të ndërtimit të marrëdhënieve konstruktive të bashkëpunimit, qeveria serbe po i përgjigjet me intensifikim të fushatës së çnjohjeve së pavarësisë së Kosovës.
I bëj thirrje Serbisë zyrtare që ta ndalë këtë ofensivë dhe të heqë dorë nga politikat destruktive ndaj Kosovës dhe shtetësisë së saj. Po ashtu, do të kërkoj nga faktorët relevantë ndërkombëtarë, në radhë të parë ShBA-të dhe BE-ja, si ndërmjetësues në procesin e dialogut, ta shtojnë trysninë mbi Serbinë që ta ndërpresë politikën armiqësore ndaj Kosovës.
Ne kemi treguar qartë se e kemi vullnetin për marrëdhënie korrekte e normale me Serbinë. Mirëpo nuk mund të lejojmë që ky vullnet i yni të nëpërkëmbet.
Si kryeministër i Kosovës do të shqyrtoj me kujdes situatën e krijuar dhe do të veproj konform interesave të Republikës dhe qytetarëve të saj.
Më 27 shkurt, kryeministri i Kosovës njoftoi se qeveria e Kosovës vendosi ta heqë përkohësisht taksën 100 % të vendosur për mallrat që importohen nga Serbia dhe Bosnja e Hercegovina.
Në një deklaratë për mediat, Kurti u shpreh se ky vendim është marrë për të parë reagimin e Serbisë kundrejt njohjes së Kosovës si shtet, dhe do të vihet në zbatim duke filluar nga data 15 mars.
Sipas Kurtit, kjo gjë do të zgjasë për një periudhë 90 ditore, deri më 15 qershor dhe nëse Serbia nuk ka reflektuar për marrëveshje me Kosovën, taksa do të rivendoset.
