Aktualisht Elseid Hysaj mund të themi se nuk po kalon një etapë të këndshme në karrierë. Po flasim konkretisht për eksperiencën e tij në Napoli. Anësori kuqezi nuk arriti të largohet në këtë merkato vere dhe gjërat sa vijnë e ndërlikohen akoma më shumë.
Në sytë e C.Ancelottit, Hysaj nuk është një titullar dhe është i pari që sakrifikohet kur bëhet fjalë për futbollistët që duhen grumbulluar, kështu ndodhi edhe në sfidën e parë në Champions kundër Liverpool. Ndërkohë së fundmi ka reaguar edhe trajneri i Kombëtares Edoardo Reja, duke i dalë në mbështetje mbrojtësit shkodran.
Përgjatë një interviste për “Radio Kiss Kiss”, tekniku italian ka folur për situatën që po kalon Napoli, fitoren ndaj Liverpool, shanset që kanë blutë për të fituar titullin në Serie A, por u ndal duke folur dhe për Hysajn, i cili në drejtimin e tij realizoi dhe golin e parë në Kombëtare: “Hysaj, mes futbollistëve që kam drejtuar, është një nga ata që di të sulmojë më mirë”.
