Gjykata e Posaçme e Apelit, ka lënë në fuqi masën e sigurisë ”Arrest me burg” për prokurorin e Kukësit Edmond Karriqi, dhe për shoferin e tij, Isuf Gega, deri në përfundim të hetimeve.
Karriqi kishte kërkuar ndryshimin e masës së sigurisë për shkak të gjendjes së tij shëndetësore, por diçka e tillë nuk është aprovuar.
Prokurori dhe shoferi i tij u arrestuan me urdhër të SPAK, më 30 qershor në qendër të qytetit të Kavajës me akuzën e korrupsionit.
Përgjimet e kryera nga SPAK, sollën arrestimin e pokurorit, pikërisht në momentin kur ai sapo kishte marrë 2 mijë euro për të liruar nga qelia një person i cili ndodhej nën hetim.
Dyshohet se Karriqi i ka marrë 2 mijë euro vëllait të një personi të kapur për drogë dhe që aktualisht ndodhet në burg. Ky rast është i filmuar pasi magjistrati ka qenë nën vëzhgim dhe survejim nga oficerët e Prokurorisë.
Prokurori Karriqi ishte emëruar përkohësisht në krye të organit të akuzës në Kukës, në muajin mars të këtij viti, me vendim të Këshillit të Lartë të Prokurorisë.
