Kryetari i Bashkisë së Tiranës Erion Veliaj ka replikuar sërish ndaj kreut të Partisë Demokratike Lulzim Basha. Duke ju referuar dy shtëpive të ndërtuara nga një biznesmen në Tiranë për dy familje të dëmtuara gjatë tërmetit, Veliaj u shpreh:
“Dikush që na kishte parë sot tha: Lali Eri, këto shtëpi i ka bërë ky oligarku që i ka dhënë edhe dy vila Lul Bashës, mos harro! I thashë, lali, ka një diferencë shumë të madhe: kur Partia Socialiste i kërkon ndihmë një sipërmarrësi, i kërkon për të ndihmuar Afërditën dhe Mirelën, kur Partia Demokratike i bie në qafë një sipërmarrësi, e bën për Lulin edhe për kunatin”.
Gjatë këtij takimi, Veliaj ka përmendur edhe argumentin e rihapur të inceneratorëve, ku të dyja forcat politike kanë akuzuar njëra-tjetrën.
“Shoh që sot janë të mërzitur që Tirana është më e pastër. Sot janë të mërzitur që në vend të atij mullarit me plehra është një kodër e gjelbër. Sot janë të mërzitur që në vend të atyre zjarreve që digjeshin të gjitha lëndët kancerogjene që vinin pastaj në mushkëritë tona, sot janë mbjellë 10 mijë pemë dhe është bërë 30% më lirë se plani i tyre. Po sigurisht që janë të mërzitur se iu kemi prishur biznesin, ” tha më tej Veliaj.
