Zëdhënësi i Presidentit Ilir Meta, Tedi Blushi, ka reaguar menjëherë pas deklaratës së kryebashkiakut Veliaj. Ky i fundit tha se vendit i duhet një figurë që shëron plagë, dhe jo një President që kalon banaqeve dhe gjysmë i dehur. Tedi Blushi sqaron më tej se Kreu i Shtetit kishte zgjedhur që sot të mos bënte dalje për mediat, në respekt të Kongresit të PS. Por marrë shkas nga akuzat që vijnë nga PS në drejtim të tij, atëherë Meta do të mbajë një konferencë për shtyp pasditen e sotme.
Ja se çfarë shkruan Tedi Blushi
Organizata Kriminale e inceneratorëve përmes një keqbërësi të interesit publik, që përdoret si qen sulmi nga Brigadieri i kësaj organizate sulmoi sot figurën e Presidentit të Republikës me shpifje të denja për një rrugaç.
Të gjithë shqiptarët e ndershëm dhe patriotë i dinë mirë arsyet se përse Organizata Kriminale e inceneratorëve dhe të gjithë kriminalizimit të shtetit e shoqërisë e urren Presidentin Meta si denoncuesin e palëkundur, bazuar mbi fakte publike dhe transparente, jo vetëm të aferës makabre të inceneratorëve, por edhe të shumë koncesioneve të tjera korruptive.
Presidenti i Republikës ndonëse kishte vendosur edhe në respekt të Kongresit të PS të mos bënte asnjë postim apo dalje mediatike, pas shpifjeve të programuara nga organizata e incineratorëve kundër Kreut të Shtetit, në respekt të të gjithë qytetarëve, por edhe të delegatëve të Kongresit të PS sot pasdite do të mbajë një konferencë shtypi.
