Kreu i KED-së, Ardian Dvorani do të paraqitet nesër në orën 10:00 në Prokurori, me kërkesën e kësaj të fundit.
Mësohet se thirrja i është drejtuar nga prokurori Alket Mersini, në lidhje me kallëzimin që presidenti Meta ka bërë ndaj tij. Pritet që në pyetje të merren edhe disa nga anëtarët e Këshillit të Emërimeve në Drejtësi.
Kujtojmë se më herët ditën e sotme ishte kreu i shtetit ai i cili ngjiti shkallët e prokurorisë së Tiranës. Meta publikoi një video ditën e sotme në rrjetet sociale, ku listonte argumentat e tij në lidhje me akuzat e ngritura ndaj kreut të KED-së.
“Ardian Dvorani nuk ka publikuar 32 mbledhjet e KED, avokatit të popullit i është mohuar e drejta për të marrë pjesë në vendimmarrjen më kyçe, në mungesë të transparencës mund të manipulonte procesin e skualifikimit të padrejtë.
Nga 37 kandidatë ia doli të lerë në garë vetëm 6 për 4 vakanca duke e kthyer procesin në emërim të detyruar. Kushtetuta e ndalon Presidentin të bëjë dy emërime njëherësh, ligji e bën të qartë se për cdo vakancë afati i emërimit është 30 ditë. Pse Dvorani nuk i përcolli në një ditë listat për Kuvendin dhe Presidentin?”, tha Presidenti ndër të tjera.
