Një prokuror i Gjirokastrës është pezulluar ditën e sotme nga puna, ndërsa është thirrur dhe në Policinë Gjyqësore. Ai u evidentua falë një operacioni masiv dhjetëmujor kundër trafikut ndërkombëtar të drogës.
Prokurori i pezulluar është Spartak Çoçoli, i cili është marrë fillimisht në pyetje në janar të këtij viti nën dyshimet për korrupsion dhe i është caktuar nga gjykata mass e sigurisë “detyrim paraqitjeje”.
Të dhënat i ka bërë të ditura në konferencën për shtyp drejtori i Policisë së Shtetit, Ardi Veliu.
“Në kuadër të këtij hetimi u evidentua një rast i dyshuar korrupsioni në sistemin e drejtësisë. Në datë 24 janar 2019 u ndaluan shtetasit E. H., banues në Tiranë dhe E. D., banues në Përmet, si dhe u procedua masa e sigurimit personal “Detyrim për tu paraqitur në policinë gjyqësore” dhe “Pezullim i ushtrimit të detyrës publike” i shtetasit S. Ç., banues në Gjirokastër (Prokuror pranë Gjykatës së Shkallës së Parë Gjirokastër). Këta shtetas janë akuzuar për veprat penale “Korrupsion aktiv i gjyqtarit, prokurorit dhe i funksionarëve të tjerë të drejtësisë”, “Deklaratë e rreme përpara oficerit të policisë gjyqësore”, tha drejtori i PSH, Ardi Veliu.
Operacioni i Policisë “Brezi i gjelbër” ka arrestuar 61 shtetas shqiptarë dhe të huaj, ndërsa janë kapur mbi 1 ton canabis, 1.23 kg kokainë e heroinë.
