Presidenti i Republikës, Ilir Meta është shprehur i bindur se Shqipëria po mbushet me kanabis për shkak të periudhës elektorale që po vjen.
I ftuar në “Aktualitet” nga gazetari Bejdo Malo, Meta tha se gjithmonë, para zgjedhjeve, në Shqipëri ‘lëshohet dora’ përsa i përket mbjelljes së kanabisit. Presidenti shtoi më tej se një problem i madh në vendin tonë është edhe mbizotërimi i grupeve kriminale.
Ai u shpreh se ‘mafia’ kërkon të dominojnë në çdo aspekt, në tregti, në ndërtime, në çdo investim.
Gazetari Malo: Sipas Zërit të Amerikës, apo sipas statistikave të Bashkimit Europian, Italia, ka kryer mbi 1970 orë fluturime në territorin Shqiptar. Për çudi janë 1970 parcela dhe mbi 25 % më shumë sesa vitet e kaluara me bimë narkotike, edhe pse kishim një ministër Gjeneral.
Presidenti Meta: Fakti që jemi në një vit elektoral, është për të mos kërkuar edhe shumë angazhim në këtë drejtim. Dihet se sa herë ka pasur periudha elektorale janë rritur sipërfaqet e kultivuara me lëndë narkotike. Por, janë rritur dhe aktivitet e tjera të grupeve kriminale për fat të keq. Ky konstatim, që erdhi edhe nga Organizata së Kombeve të Bashkuara, që cilëson Shqipërinë si burim kryesor në Europë, për kanabisin edhe për trafiqet, janë të përsëritura tashmë, janë solide dhe kuptohet është mungesa totale e vullnetit politik, për t’i luftuar këto fenomene. Dhe, akoma më keq është loja politike, për t’i përdorur aktivitete të tilla kriminale në interes të deformimit të proceseve zgjedhore, apo të favoreve, për të tërhequr këto grupe në përpjekjen për të mbajtur me pahir pushtetin.
