Analisti Fatos Lubonja ka komentuar sot situatën politike në rubrikën “Opinion” në News 24.
Lubonja u tregua kritik me lëvizjet e Prokurores së Përgjithshme, Arta Marku, për të cilën tha se duhej të ishte më e kujdesshme dhe se po përdoret nga mazhoranca.
Sa i përket lirimit nga detyra të kreut të Policisë së Shtetit, Lubonja tha se kjo është bërë për qetësimin e opnionit publik, ndërsa shtoi se të kujton regjimin e dikurshëm teksa lëvizjet bëhen pa arsye bindëse.
Lirimi i Çakos
Të kujton regjimin e dikurshëm, që hiqeshin njerëzit dhe nuk kishte transparencë, sepse vendosnin 2 njerëz. Largimi i Çakos është i vonuar, është bërë për qetësimin e opinionit publik, por nuk mjafton.
Nuk besoj se ka ndërhyrë faktori ndërkombëtar, hipoteza më e besueshme ka të bëjë edhe me raportin e tij me ministrin e tanishëm. Kjo nuk ndryshon gjë.
Nisja e vrullshme e Markut
Nuk e prisja, ajo ka shkuar atje për t’u përdorur por s’e mendoja me kaq shumë vrull dhe kaq pa kujdes. Nëse ky ndryshim do bëhej, do ishte me anë të Vettingut.
Duhej të ishte më e kujdesshme sepse Shqipëria nuk është e mbushur me prokurorë.
Besoj se kjo e vështirëson situatën dhe krijon një ndjenjë kaosi, sepse a mund të ketë kaq autoritet sa të bëjë këto lëvizje?
Me duken lëvizje të papjekura që tregojnë se Prokurorja e Përgjithshme e Përkohshme ka marrë këtë detyrë dhe po vepron e komanduar nga të tjerët. Duhet shumë kujdes, plus që duhen dhe justifikime, në një farë mënyre arsye.
Në thelb, ky problem ka të bëjë dhe është provë e dështimit të Reformës në Drejtësi, tregon që ka qenë një reformë për ta kapur mazhoranca.
Protesta e opozitës
Opozita ka detyrë që të protestojë dhe të shprehë pakënaqësi që besoj se janë në popull. Kauza është e përsëritur. Pyetja është se çfarë tjetër duhet të bëjë opozita përveç denoncimit. N.q.s shqiptarët po ikin, kjo ka të bëjë me humbjen e shpresës, opozita duhet të krijojë një alternativë shprese. TIRANA TODAY
