Qindra mijëra mbështetës të opozitës po mblidhen përpara ndërtesës së qeverisë, me parulla “Rama ik”, “Parlament i krimit”, “Qeveri e korruptuar”. Në krye të turmës që marshon në drejtim të Kryeministrisë qëndrojnë banorët e Astrit dhe aktorët me banderolën gjigante “Mbro Teatrin”.
Aktorët protestojnë për shembjen e Teatrit dhe në krye të tyre duket Neritan Liçaj. Ky i fundit foli edhe për mediat ku u shpreh se: Kjo është një protestë e Partisë Demokratike, e të papunëve, të varfërve, të aktorëve dhe e të gjithë atyre që kanë pakënaqësi ndaj pushtetit.
Kreu i Partisë Demokratike, Lulzim Basha ndodhet ende në selinë e partisë dhe pritet t’i bashkohet për pak minuta protestuesve. Ndryshe nga protestat e tjera, në protestën e sotme vihen re simbolet e Partisë Demokratike, si flamuri i saj.
Protestuesit kanë hedhur tymuese me ngjyrë të zezë përpara ndërtesës së Kryeministrisë.
