Presidenti i Kosovës, Hashim Thaçi nuk do ta mbajë sonte fjalimin nga zyra e tij me qytetarët e vendit.
Zyra e presidentit Thaçi ka bërë me dije se konferenca e tij do të shtyhet për ditën e nesërme, në orën 20:00.
Kjo do jetë deklarata e parë publike e presidentit Thaçi, pas aktakuzës së ngritur nga Zyra e Prokurorit të Specializuar, e cila e akuzon për krime lufte.
Në Aktakuzë pretendohet se Hashim Thaçi, Kadri Veseli dhe të dyshuar të tjerë janë penalisht përgjegjës për afërsisht 100 vrasje të paligjshme. Krimet e paraqitura në Aktakuzë përshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë. Aktakuza është vetëm një padi penale e cila është rezultat i një hetimi të gjatë dhe dëshmon vendosmërinë e ZPS-së se mund t’i provojë të gjitha akuzat jashtë dyshimit të arsyeshëm. Një gjykatës i procedurës paraprake i DHSK-së është duke e shqyrtuar Aktakuzën për të vendosur nëse do t’i konfirmojë akuza.
