Kreu i Partisë Republikane, Fatmir Mediu bën me faj kryeministrin Edi Rama për pozitat në të cilën ndodhet tani Kosova, kur komandantët dhe ata që luftuan për çlirimin e Kosovës u duhet të përballen me akuza për krime lufte e kundër njerëzimit në Hagë.
Mediu e cilëson jashtëzakonisht shqetësuese presionin që po i ushtrohet autoriteteve politike në Kosovë.
Sipas tij, Serbia jo vetëm që ka në krah Rusinë e Kinën por dhe është ndihmuar nga Rama i cili ka arritur që të transformojë figurën e Vuçiç nga krahu i djathtë i Millosheviçit të duket si njeriu i paqes dhe i negociatave dhe lider democrat.
“Serbia ka arritur të filtrojë edhe në marrëdhënie në Europë dhe në SHBA, kjo edhe për naivitet ose meskinitet të politikës shqiptare. Ne kemi bërë që Vuçiçi të dukej si njeriu i paqes dhe i negociatave dhe lider demokrat në një kohë që ka qenë krahu i djathtë i Millosheviçit. Duke pasur një aleat të fuqishëm si Rusia në krah dhe politika që ndikojnë si matanë Atlantikut dhe BE-së absolutisht ata kanë tentuar ti kthehen çështjes së Kosovës në një qasje tjetër.
Në një lidership që shfaqet pro europian, ndonjëherë në bashkëpunim me NATO-n, me mbështetjen e fortë të Rusisë dhe Kinës, në raporte të cilat i kanë rregulluar me SHBA falë dhe miopisë dhe meskinitetit të politikës shqiptare. Në këtë mënyrë ne po ecim mbrapsht. Ajo që ka qenë historia e shqiptarëve në fillim të shekullit, për fatin e keq, për mungesë të një trajtimi të drejtë dhe një lidershipi qeveritar në Tiranë me zotin Rama, tërësisht në drejtim të kundërt me interesa shqiptare, edhe për shkak të padijes ndoshta, ka sjellë një situatë të papranueshme.’’, tha Mediu në ‘Ora News’.
