Mbrëmjen e djeshme, pas një ndjekje të gjatë në det, që nisi nga Policia Kufitare e Vlorës, Delta Forcë, Policia Kufitare e Durrësit si dhe të ndihmuar nga Roja Bregdetare, Guardia di Finanza në Vlorë u sekuestrua një gomone me 2 motorë të fuqishëm nga 300 kuaj fuqi.
Ndjekja ka zgjatur disa orë, duke nisur në ujërat territoriale shqiptare. Nëpërmjet zyrës ndërlidhëse të Policisë së Shtetit në Bari, mjeti u gjurmua nga Guardia di Finanza e Barit me një avion dhe një helikopter, si dhe helikopteri i FRONTEX.
Tre skafistët duke e patur të pamundur të vijonin rrugën drejt Italisë janë kthyer sërish drejt Shqipërisë.
Pasi kanë përfituar nga deti i trazuar trafikantet kanë hedhur lëndën narkotike në det dhe me shpejtësi kanë dalë në breg në një zonë të vështirë dhe janë larguar.
Forcat policore që ishin në ndjekje po vijojnë krehjen e zonës për kapjen dhe arrestimin e tyre.
Vijojnë operacionet e kërkimit të lëndës narkotike të hedhur në det nga trafikantët.
Në këtë operacion janë angazhuar forcat e Policisë së Shtetit, Rojës Bregdetare dhe Guardia di Finanzas.
