Ish-deputetja e PD-së, Jorida Tabaku, ka zbuluar sot se aksioni i opozitës nuk do ndalet vetëm me lënien e mandateve. Teksa ka qënë e ftuar në studion e “Ora News”, ajo tha se protestat e opozitës do të vazhdojnë, e për këtë ekziston një plan pune. Po kështu, Tabaku ka sqaruar të gjithë zërat, duke konfirmuar se akti i ndërmarrë nga ana e opozitës, nuk është një apel i hapur për tu ulur në tryezë me Ramën. Sipas saj, nuk bëhet fjalë për një marrëveshje për ndarje pushteti, ndarje drejtorish dhe ministrish.
“Ne do të jemi me qytetarët. Do të nisë një tur në të gjitha qytetet. Do të ketë një plan pune. Do të jetë i ngjashëm me turin e para protestave që e ngriti fort frymë. Pamë qytete të tëra që kishin nevojë për vëmendje dhe që janë shënuar me zero nga qeveria.
Rezultatin kryesor ne e presim me heqjen dorë të mandateve me të cilën PD ka treguar se Parlamenti nuk ekziston më, dhe demokracia ka rënë. Pa gjysmën, Parlamenti duhet të ishte shpërndarë.
Ky akt që ne kemi ndërmarrë, nuk është një thirrje për t’u ulur në tavolinë me Edi Ramën. Nuk ka këtu marrëveshje për ndarje pushteti, ndarje drejtorish dhe ministrish.
Këtu bëhet fjalë për të kthyer përmbys këtë sistem që është ngritur në 6 vite, dhe për të krijuar diçka të re për të ardhmen evropiane. Kërkohet një qeveri tranzicioni për të na çuar në zgjedhje të lira dhe të ndershme”, deklaroi ajo.
