Një makinë e cila u shpëton policëve, dhe një gazetar që e shtrijnë në tokë vetëm sepse filmoi operacionin. Ka qënë kjo skena që është filmuar nga një banor i lagjes “Vorri Bomit”, ku dhe ndodhi aksioni policor mesditën e sotme.
Shënjestra që dyshohej se ishte trafikant, që shpërndante lëndë narkotike, arriti që të largohej, ndonëse i bënin thirrje për të dalë jashtë makinës. Sikundër shihet qartazi dhe në pamjet në fjalë, jeta e njërit prej agjentëve të policisë u vu në rrezik, pas shpejtësisë së mjetit që u arratis.
“Hape derën, hape more derën, policia, o by*h q*r, hape derën”, dëgjohen agjentët që i drejtohen drejtuesit të makinës tip “Benz” që të dalë jashtë. Drejtuesi i mjetit i jep gaz duke u larguar me shpejtësi.
Këtë çast po e filmonin të pranishmit, sikundër edhe gazetari Ergys Gjençaj. Por ky i fundit u ndalua nga policia, e madje e shtrinë barkas.
