Ish-deputeti i PD-së, Bardh Spahia ka reaguar në lidhje me aksidentin që ndodhi sot në aksin Shkodër-Lezhë, ku dy murgesha humbën jetën.
Spahia shprehet se ambulanca ka shkuar në vendin e ngjarjes pa mjek, mirëpo kjo deklaratë është përgënjeshtruar nga Spitali i Shkodrës.
“Keqardhje e ndjerë për aksidentin e rëndë që ndodhi në Krye Bushat të Shkodrës! Si mjek jam i skandalizuar kur mësova se ambulanca kishte shkuar të jepte ndihmën, pa asnjë mjek! Një papërgjegjshmëri e tillë kriminale dëshmohet vetëm nën qeverisjen e Rilindjes! Ndihma e menjëhershme në raste të tilla është jetike, por kjo nuk kuptohet nga amatorët e përzgjedhur nga Rilindja! Si mund të luhet kështu me jetën e njerëzve!”, shprehet Spahia në “Facebook”.
Spitali i Shkodrës, në një reagim zyrtar ka theksuar se të paktën 2 ambulanca kanë shkuar drejt vendit të ngjarjes, së bashku me dy mjekë dhe infermierë.
Reagimi i Spitalit të Shkodrës
Duke shprehur ngushellimet për 2 viktimat në aksidentin rrugor të ndodhur në Bushat, Spitali Rajonal Shkodër bën me dije si më poshtë: Menjëherë pasi jemi njoftuar për aksidentin e ndodhur në Bushat rreth orës 15:00, dy ambulanca të spitalit Shkodër janë nisur menjëherë drejt vendngjarjes së bashku me dy mjekë dhe infermierë.
Dy persona kanë humbur jetën në vendngjarje, ndërsa 5 të plagosur u transportuan në spitalin e Shkodrës, ku morën trajtimin e nevojshëm mjekësor. Aktualisht janë jashtë rrezikut për jetën. Një prej të plagosurve ka dalë nga spitali dhe 4 të plagosur ndodhen në kujdesin e mjekëve.
