Legjenda e Formula 1 Niki Lauda ka vdekur në moshën 70 vjeçare. Lajmin e ka konfirmuar edhe familja e tij.
Lauda, i cili fitoi kampionatin e F1 në 1975 dhe 1977 me Ferrarin dhe përsëri në 1984 me McLaren, vdiq të hënën – tetë muaj pas kryerjes së transplantimit të mushkërive.
Ai u konsiderua si një nga drejtuesit më të mirë të sportit ndonjëherë dhe në vitin 1976 u dogj keq kur u rrëzua gjatë Grand Prix gjerman, por bëri një kthim të shpejtë në gara vetëm gjashtë javë më vonë.
Në një deklaratë, familja austriake tha: ‘Me trishtim të thellë, njoftojmë se Niki ynë i dashur ka vdekur në mënyrë paqësore me familjen e tij të hënën’.
AKSIDENTI
Në 1 gusht 1976, Niki Lauda pëson një aksident të rëndë në Çmimin e Madh të Gjermanisë. Piloti austriak, i cili ndërroi jetë dje në moshën 70-vjeçare, humbi kontrollin e Ferrarit të tij në xhiron e dytë të garës, pasi pista e vjetër e Nurburgringut nuk ishte tharë ende nga shiu i rënë gjatë gjithë paradites.
Pasi përplaset dhunshëm me barrierat e pistës, Ferrari merr flakë. Lauda pësoi djegie të gradës së parë dhe të tretë në kokë, fytyrë dhe duar. Gjithashtu, mushkëritë iu dëmtuan nga thithja e gazrave të dëmshme.
Arturo Merzario, Guy Edwards, Brett Lunger dhe Harald Ertl ishin pilotët që dolën nga makinat e tyre dhe ndihmuan austriakun që të largohej nga njëvendëshja në flakë, duke i shpëtuar jetën.
Pavarësisht dëmtimeve të rënda, Lauda u kthye të garojë vetëm 42 ditë më pas, në garën e Italisë. Në Monza ai përfundoi në vendin e katërt dhe me fashot e fytyrës të mbuluara nga gjaku.
