Disa studiues kinezë kanë dalë në përfundimin se ajri i kondicionuar mund të ndikojë në përhapjen e koronavirusit.
Studiuesit morën në konsideratë 10 raste infektimi, nga tre familje që po darkonin në të njëjtin restorant në Guangzhou, në jug të Kinës. Sipas artikullit të publikuar, thuhet se rrjedha e fortë e ajrit nga kondicioneri mund të ketë shpërndarë piklat në ajër nëpër tavolina.
Pacienti i parë i studiuar sapo ishte kthyer në Wuhan, ku një ditë më parë kishte darkuar me 3 të afërm në një restorant pa dritare, por me ajër të kondicionuar.
Raportohet se po atë ditë personit i kishte nisur kolla dhe ethet, ndërsa kur shkoi në spital rezultoi pozitiv me koronavirus.
Brenda dy javëve 4 anëtarë të familjes së tij dhe 3 anëtarë nga familja që po darkonte pranë tyre në restorant, ishin prekur nga COVID-19.
“Nga ekzaminimet tona mbi rrugët e transmetimit, arritëm në konkluzionin se shkaku më i mundshëm i transmetimit ishin shpërndarja e piklave, të cilat u nxitën nga ventilimi me ajër të kondicionuar. Faktori çelës i transmetimit ishte drejtimi i rrymës së ajrit.
“Piklat në ajër, të njohura ndryshe si aerosol, ndjekin rrymën e ajrit, prandaj përqendrimi i tyre i vogël në zona të tjera të restorantit nuk ka qenë i mjaftueshëm për të shkaktuar infeksion në zona të tjera”, thuhej në studim.
