Artistë, pjesëtarë të shoqërisë civile dhe qindra mbështetës të Partisë Demokratike, kanë protestuar për Teatrin Kombëtar. Me pankarta në duar si “Unë jam teatri”, moto e cila ka shoqëruar protestën disa mujore, artistët kanë ngritur zërin bashkërisht, e nga ana tjetër, ministri Ahmetaj ka dhënë detaje në lidhje me Teatrin.
Nga foltorja e Kuvendit, Ahmetaj tha se Teatri i Ri do ketë një sipërfaqe 8 herë më të madh se ai aktual. “Projektligji për Teatrin është një domosdoshmëri për të sqaruar.
Në thelb nuk është duke u shkatërruar asgjë, por është duke u ndërtuar Teatër Kombëtar për aktorët. Ajo godinë nuk i përmbush kushtet për të ushtruar art në favor të qytetarëve.
Prona e teatrit është pronë publike, ku brenda kësaj prone… artistët përfitojnë 4 salla nga godina e re. Por nuk ka kate që do ti shfrytëzojë privati në këtë pronë. Me godinën e re do të kemi një teatër 8 herë më të madh. Ka rritje të vlerës së pronës në favor të qytetarëve. Bashkia kërkon të bëjë zhvillim të integruar të pronës.
Teatri i ri do ketë 9000 m2, në funksion të artit, nga 1126 metra jo funksionale që janë tani. Pra, 8 herë më shumë. Buxheti i shtetit harxhon 0 lekë dhe merr 9000 m2 truall. Qytetarët përfitojnë të njëjtën pronë, por më të madhe. Aktorët do përfitojnë katër salla të reja.
Prona e Teatrit ngelet e pacënuar, përfitojmë 8 herë më shumë m2 në favor të qytetarëve dhe artistëve. Ku shkoi Teatri? Teatri do të jetë atje, më i mirë nga sa është aktualisht. Janë 97 mln euro, shumëfishohet vlera e pronës”, tha ai.
