Ka vetëm një muaj që është pjesë e Partisë Demokratike, por është bërë deputet i saj, dhe si i tillë kërkon t’ju japë leksion demokratëve, si duhet të menaxhojnë humbjen, një ndër më të rëndat në historinë e saj.
Agron Shehaj, i cili kryesonte listën e kandidatëve të PD-së në qarkun Vlorë, me anë të një deklarate, e konsideron rezultatin e zgjedhjeve si humbje të një ekipi të tërë, jo vetëm të kapitenit. Madje ai nuk nguron të deklarojë se në këtë humbje kanë kontribuar qëllimisht edhe disa demokratë.
Në vlerësimin e të riut në PD, kundërshtarët e Bashës sot, janë “ata që sakrifikuan partinë, vetëm për të parë të rrëzuar kryetarin, i cili vendosi me të drejtë, t’u ndërpresë, jo marrëdhënien me partinë, por ofiqet.”
Më tej Shehaj sjell një rast konkret, sipas të cilit një prej firmëtarëve të listës “anti-Basha” shpërfillte demokratët kur ata gjendeshin përballë nevojave jetike.
“Unë kam qenë në bazë gjatë një muaji intensiv në Vlorë, dhe e di se shumë prej atyre që sulmojnë Bashën, urrehen nga baza (dhe përtej saj) për çfarë kanë bërë dhe çfarë nuk kanë bërë. Dua të ndaj një kujtim të një demokrati nga Novosela, i cili më tha se, “kur shtëpitë u ishin përmbytur nga Vjosa, mori në telefon një prej firmëtarëve të listës anti Basha. E dini cila ishte përgjigja e tij? “Jam i sigurt se do të mbijetoni edhe kësaj here”.
Ai u sugjeron sulmuesve të Bashës, “të futen në garë, të fitojnë nëse kanë një projekt, dhe nëse demokratët u besojnë! Nëse kanë një zemërim, ta ndajnë edhe atë me demokratët”.