Afrika e Jugut është përfshirë nga një skandal i madh, ku tifozët kanë pushtuar fushën dhe kanë shkatërruar stadiumin. Bëhet fjalë për një nga stadiumet moderne në Afrikë, i ndërtuar nga themelet në vitin 2010, ku u zhvilluan ndeshje të Botërorit të Afrikës së Jugut.
“Moses Mabhida” i Durbanit këtë fundjavë është shkatërruar brutalisht nga tifozë të irrituar, huliganë dhe njerëz të dhunshëm që nuk kanë lidhje me futbollin. Ajo çfarë ndodhi, në fakt, ishte zemërim për eliminimin e Kaizer Chiefs nga “Nedbank Cup”, apo Kupa e Afrikës së Jugut, nga një skuadër disi më inferiore si Free State Stars.
Tifozët ultras nisin të dhunonin fillimisht një grua që ishte ngarkuar me detyrën për sigurinë në ambientet e brendshme të stadiumit. Ajo është shtruar tashmë në spital, por “të egërsuarit” nuk u ndalën me kaq. Ata shkatërruan stadiumin dhe zonën e dedikuar shtypit. Policisë iu desh të përdorte gazin lotsjellës dhe granatat tymuese për të shpërndarë turmën e irrituar.
