Dy gjyqtare të Gjykatës së Lartë janë qëlluar për vdekje në Kabul mëngjesin e kësaj të diele. Gjyqtaret ishin vendosur në shënjestër të njerëzve të armatosur, gjatë kohës që po shkonin në zyrën e tyre me një automjet.
Atyre u është ngritur një pritë, ku ka mbetur i plagosur edhe shoferi i tyre, shkruan BBC. Incidenti ndodhi në zonën Qala-e-Fathullah të Kabul dhe askush nuk ka marrë përgjegjësinë për sulmin.
Dyshimi për vrasjet e fundit ka rënë mbi talibanët, por militantët nuk e kanë pranuar kryerjen e tyre. Kohët e fundit shënjestër e atentateve kanë qenë gazetarët, aktivistët dhe politikanët.
Grupet për të drejtat e njeriut thonë se vrasjet kanë për qëllim të heshtin dhe të frikësojnë zërat e pavarur dhe shoqërinë civile në Afganistan.
