Kryetarja e LSI-së Monika Kryemadhi është ndalur sërish tek çështja e inceneratorëve, ndërsa kërkon që të hapen sa më shpejtë “letrat e Pandorës”. Ajo ka shpërndarë një video ku tregon se deputeti i PS-së Alqi Bllako, ka përfituar nga inceneratorët nëpërmjet pagave të babait në shumën 125 mijë euro, në një situatë të konfliktit të pastër të interesit.
“Ja se si Deputeti i PS Alqi Bllako, ish-Drejtori i AKUM ka përfituar nga mega afera e inceneratorit të Tiranës, nëpërmjet pagave të babait në shumën 125.000 Euro, duke e punësuar në kompaninë e inceneratorit të Tiranës, në një situatë konflikti të pastër interesi.
‘Letrat e Pandorës’ së Tiranës duhen hapur sa më parë!”.
Brenda dhe jashtë vendit, interesi është në rritje që SPAK dhe institucionet e reja të drejtësisë, të zbardhin sa më parë të vërtetën e tre inceneratorëve, dhe të ndalojnë vjedhjen shtetërore që përditë zbras xhepat e qytetarëve për të mbushur llogaritë në offshore të zyrtarëve të Rilindjes dhe individëve lidhur me ta”, shkruan Kryemadhi.
Më herët, SPAK arrestoi një nga ‘peshqit e mëdhenj’, ish-ministrin Lefter Koka. SPAK e akuzon Lefter Kokën për “shpërdorim të detyrës”, “pastrim të parave” dhe “korrupsion”.
SPAK prangosi ish-ministrin e Mjedisit, Lefter Koka, për dosjen e shumëpërfolur, atë të inceneratorit në Elbasan.
