Policia e Kosovës njofton se ka arrestuar ish-kryetarin e Kaçanikut, Xhabir Zharku.
Ish-zyrtari i PDK-së akuzohet për veprat penale ‘Keqpërdorim i pozitës dhe autoritetit zyrtar” dhe ‘Ushtrim i ndikimit’”. Rasti në fjalë dyshohet se ka ndodhur gjatë kohës kur ai ushtronte postin e kryetarit të Kaçanikut, në vitin 2010.
“Sot, më 14.12.2019, Njësia për Hetimin e Krimeve Ekonomike dhe Korrupsionit e Ferizajt, ka arrestuar një të dyshuar për përfshirje në veprat penale: ‘Keqpërdorim i pozitës dhe autoritetit zyrtar’ dhe ‘Ushtrim i ndikimit’. Me aktvendim të prokurorit, i dyshuari është dërguar në mbajtje për 48 orë”, është shprehur zëdhënësi i policisë, Baki Kelani për “Telegrafi”.
Ndërkohë bëhet me dije se Zharku ka qenë i dënuar edhe më parë në vitin 2011 për armëmbajtje pa leje. Në atë kohë ai u largua nga Kosova duke i shpëtuar burgut. Për gati 5 vjet e gjysmë ish-kryetari i Kaçanikut qëndroi në arrati në Suedi.
