Ministri i Infrastrukturës dhe Ambientit në Kosovë, Arban Abrashi deklaroi se pritet që fluturimet në Aeroportin Ndërkombëtar të Prishtinës “Adem Jashari” të rinisin brenda dhjetë ditësh.
Në një prononcim për Radion Evropa e Lirë, Abrashi tha se ka zhvilluar takime me të gjitha institucionet për rikthimin sa më të shpejtë të fluturimeve.
“Po bëjmë përpjekje që brenda dhjetë ditësh të bëhet rifillimi i plotë i fluturimeve ndërkombëtare, duke respektuar plotësisht udhëzimet për masat e sigurisë për parandalimin e COVID-19 (sëmundjes që e shkakton koronavirusi), të lëshuara nga Agjencioni Evropian i Sigurisë së Aviacionit (EASA) dhe udhëzimet tjera nga Ministria e Shëndetësisë”, tha ai.
Fluturimet në Kosovë janë mbyllur që prej muajit mars për shkak të situatës së krijuar nga pandemia e koronavirusit.
Deri më tani, Kosova ka regjistruar gjithsej 1,263 raste me koronavirus, prej të cilëve 912 pacientë janë shëruar, ndërsa 31 kanë vdekur.
