Ambasadori i Kinës në Shqipëri, Zhou Ding, ka folur në lidhje me akuzat se koronavirusi është krijuar në një laborator në Wuhan të Kinës.
Në një intervistë për emisionin “Real Story”, Zhou Ding tha se kjo gjë nuk është vërtetuar akoma, teksa shtoi se shkencëtarët po punojnë për ta sqaruar këtë çështje.
“Të gjithë shkencëtarët e shëndetit publik janë të mendimit se koronavirusi nuk është i manipuluar apo i krijuar në laborator”, tha ai.
Ambasadori tha se mbetet ende pikëpyetje fakti nëse ky virus e ka origjinën në Kinë. Sipas tij, ajo çfarë është e rëndësishme për momentin është bashkëpunimi mes vendeve, pasi gjendja e shkaktuar nga koronavirusi nuk ka mbaruar akoma.
“Është e vështirë për mua ta them këtë, por dua të them dy gjëra. Revistat shkencore dhe shkencëtarët thonë që virusi nuk u krijua në laborator. Është pikëpyetje nëse ky virus e ka origjinën në Kinë, por unë nuk dua të transmetoj lajme të rreme. Unë insistoj që kjo pyetje të studiohet dhe të ketë përgjigje nga shkencëtarët.
Para se ata të nxjerrin konkluzion, mendoj se nuk është e përshtatshme të diskutohet kjo gjë. Është e rëndësishme të përgjigjemi ku lindi virusi dhe si transmetohet ai, por në këtë moment është më i rëndësishëm bashkëpunimi mes vendeve, sepse pandemia nuk ka mbaruar dhe nuk kemi ende ilaç kundër këtij virusi. Nëse përqendrohemi te zbulimi i vaksinës do të ishte më mirë”, shtoi ai.
