Referuar situatës kaotike që ndodhi në zonën e Unazës së Re, drejtori i Kadastrës, Artan Lame, sqaroi të vërtetat përmes një lidhje telefonike mbrëmë në “Opinion”. Kundërpërgjigjja e tij erdhi pas akuzave të ish-deputetit demokrat, Klevis Balliu. Ky i fundit tregoi një foto ku gjysma e godinës ishte legalizuar, gjysma tjetër jo.
“Gjysmë të vërtetat nuk bëjnë një të vërtetë. Unë jam i vjetër në debate, dhe i pranoj me kënaqësi debatet. Nëse legalizimi i atij gjysme objekti është bërë përpara 2013, e kam thënë që janë bërë legalizime të paligjshme, veçanërisht në muajt e fundit të ndryshimit të qeverisë. Ai derziu që nuk ka arritur të paguaj, nuk e ka marrë legalizimin. Projekti fillestar i Unazës ka qenë më i ngushtë. Më pas, që në kohën e zotit Berisha, projekti u zgjerua. Janë bërë legalizime abuzive, në muajt e fundit para se të ndryshohej projekti. Edhe kur u bë projekti i ri, njësoj si nga ana tjetër, këto banesa do të prisheshin”, tha Lame.
I pyetur nga drejtuesi i emisionit, nëse shteti shqiptar ka bërë nga këto padrejtësi, drejtori i Kadastrës tha se ka edhe raste të tilla. Ai shtoi se në atë zonë ka objekte të vjetra, me leje ndërtimi në kohë të ndryshme.
“Shteti shqiptar është i këtyre qytetarëve që i kanë votuar, shteti shqiptar të thashë ka bërë marrëzi. Atje ka dhe objekte të vjetra, me leje ndërtimi në kohë të ndryshme”.
Teksa të ftuarit kërkonin të ndërhynin dhe të përfshiheshin në debat, Lame në një moment e humbi durimin: “A ta mbaroj more burr…”.
